Konings

Konings is ’n bekroonde dramareeks oor ambisie, verraad en die prys van sukses.
Dolf Groenewald begin sy lewe as ’n arm weeskind met net een ding wat niemand van hom kan wegneem nie: ’n droom. Hy droom van ’n kruidenierswinkel so groot soos ’n rugbyveld, ’n plek waar alles moontlik is, en waar hy nooit weer die armoede van sy kinderdae hoef te ervaar nie.
Ná die dood van sy ouers neem Jollyboy, sy pa se voormalige vennoot, hom onder sy vlerk. Herman, Jollyboy se seun, beskou Dolf as ’n indringer en ’n bedreiging. Wat begin as stille vyandskap, groei tot ’n lewenslange stryd om mag, liefde en erkenning. Met die ondersteuning van Jollyboy, Syd en Oom Koos Bensien verwesenlik Dolf sy droom en open Superspaar. Sukses kom egter teen ’n prys. Santie, die liefde van sy lewe, trou met Herman, en soos Superspaar tot ’n magtige onderneming groei, word dit vir Dolf al hoe moeiliker om beheer oor sy sakeryk en sy eie hart te behou.
Neem asseblief kennis dat hierdie reeks in standaarddefinisie verfilm is, dit is dus nie dieselfde kwaliteit wat hedendaagse hoëdefinisiebeeld bied nie. Ons is trots om hierdie Afrikaanse juweel uit die argiewe met julle te deel - beleef die nostalgie weer saam met ons.